کانگریس گاندھی جی کی 150 ویں یوم پیدائش کے موقع پر ملک بھر میں پیدل مارچ کا اہتمام کرے گی

نئی دہلی: یکم اکتوبر- کانگریس بابائے قوم مہاتما گاندھی کی 150 ویں یوم پیدائش کے موقع پر بدھ کے روز ملک بھر میں پیدل مارچ کا اہتمام کرے گی اور گاندھی کے پیارے بھجن ‘رگھوپتی راگھ راجہ رام ‘ کے بھجن کے ساتھ باپو کا پیغام عوام تک پہنچائے گی۔

کانگریس کے جنرل سکریٹری کے سی وینوگوپال نے آج یہاں جاری ایک بیان میں کہا ہے کہ 2 اکتوبر کو ملک بھر میں گاندھی جی کی 150 ویں یوم پیدائش کے موقع پر ’ پدیاترا‘ کا اہتمام کیا جائے گا اور بابائے قوم کے پیغام کو لوگوں تک پہنچایا جائے گا۔ یہ تقریب آل انڈیا کانگریس کمیٹی دہلی میں منعقد کرے گی اور ریاستوں میں ریاستی اکائی کے ذریعہ اس کا اہتمام کیا جائے گا۔ انہوں نے کہا کہ گاندھی جی کا فلسفہ آج بھی اہم ہے ، لہذا اس کو عوام تک پہنچانا ضروری ہے۔

انہوں نے کہا کہ ملک میں گاندھی جی کے اصولوں کو پامال کیا جارہا ہے اور بے گناہوں کو مارنے پیٹنے والے مجرموں کو ضمانت مل رہی ہے اور عصمت دری کا شکار خواتین کو جیلوں میں قید کیا جارہا ہے۔ بے روزگاری عروج پر ہے۔ ایک باپ اپنے بچوں کی اسکول کی فیس ادا کرنے سے قاصر ہے ، لہذا اسے بچے کو قتل کرنے پر مجبور کیا گیا ہے۔ اداروں کو برباد کیا جارہا ہے۔