کسان تحریک کی یوم جمہوریہ پر 9 مقامات سے نکلے گی ’ٹریکٹر پریڈ‘: یوگیندر یادو

یوم جمہوریہ پر 9 مقامات سے نکلے گی ’ٹریکٹر پریڈ‘، یوگیندر یادو نے بتائی تفصیل

سوراج انڈیا کے بانی یوگیندر یادو نے میڈیا سے بات چیت کرتے ہوئے بتایا کہ یوم جمہوریہ کے موقع پر کسان پریڈ 9 مقامات سے نکالی جائے گی۔ انھوں نے کہا کہ ’’سنگھو بارڈر، ٹیکری بارڈر، غازی پور بارڈر، دھنسا بارڈر، چیلا بارڈر کے علاوہ 4 دیگر بارڈرس ہیں جو کہ ہریانہ بارڈ پر ہوگا۔ ان سبھی مقامات سے ’کسان گنتنتر پریڈ‘ نکلے گی۔‘‘ انھوں نے مزید کہا کہ کل شاہجہاں پور سے یوم جمہوریہ پریڈ نکلے گی اور یہاں سے 25-20 ریاستوں کی جھانکیاں بھی نکلیں گی۔

ٹریکٹر ریلی کا پروگرام کسی دوسرے دن بھی ہو سکتا تھا: نریندر تومر

مرکزی کی مودی حکومت کسان کی ٹریکٹر ریلی کو لے کر پریشان نظر آ رہی ہے۔ مودی حکومت کے سامنے اور دہلی پولس کی سختی کے باوجود کسان یوم جمہوریہ پر ٹریکٹر ریلی نکالنے کے لیے پرعزم ہیں، اور دہلی پولس کو بھی بالآخر ریلی کو منظوری دینی ہی پڑی۔ اب مرکزی وزیر زراعت نریندر سنگھ تومر کا ایک بیان سامنے آیا ہے جس میں وہ کہتے ہوئے نظر آ رہے ہیں کہ ٹریکٹر ریلی کا پروگرام کسان مظاہرین کسی دوسرے دن بھی رکھ سکتے تھے۔

دہلی کی طرف کسانوں کے بڑھتے قدم روکنے کے لیے پولس فورس تعینات

نئے زرعی قوانین کے خلاف کسان تنظیموں کے ذریعہ یوم جمہوریہ کے موقع پر دہلی میں نکالی جانے والی ٹریکٹر پریڈ میں شامل ہونے کے لیے کئی ریاستوں کے کسان اپنے ٹریکٹرس کے ساتھ دہلی بارڈرس پر پہنچ چکے ہیں اور ہزاروں کی تعداد میں مزید کسان پہنچنے والے ہیں۔ اس درمیان مغربی اترپردیش کے متھرا اور دیگر اضلاع کے کسانوں کو راستے میں روکنے کی تیاری پولس کے ذریعہ کی گئی ہے۔ پولس ذرائع نے اس سلسلے میں بتایا کہ متھرا سے دہلی جانے والی قومی شاہراہ اور جمنا ایکسپریس وے پر پولس-پی اے سی کے تقریباً 650 جوان تعیناتا کیے گئے ہیں۔ بتایا جاتا ہے کہ سینئر افسران نے کسی بھی حال میں دہلی کے لیے ٹریکٹر نہیں جانے کا حکم دیا ہے۔

’ٹریکٹر ریلی‘ کو لے کر یوگیندر یادو کا بڑا بیان آیا سامنے، کہا ’ہم دلّی نہیں، دِل جیتنے آ رہے ہیں‘

یوم جمہوریہ پر کسانوں نے اپنے ٹریکٹر مارچ کی تیاری مکمل کر لی ہے۔ یوگیندر یادو نے دہلی پولس سے تحریری منظوری ملنے کی جانکاری دی اور کہا کہ ’’ہم دلّی نہیں، دِل جیتنے آ رہے ہیں۔‘‘ قابل ذکر ہے کہ دہلی پولس کمشنر نے کسانوں کو ٹریکٹر پریڈ کے لیے تحریری شکل میں منظوری دینے کا حکم جاری کیا ہے۔ پولس نے پریڈ کو لے کر الرٹ بھی جاری کیا ہے۔

دہلی بارڈرس پر ٹریکٹروں کی تعداد لگاتار بڑھ رہی، پریڈ کی تیاریاں تیز

یوم جمہوریہ کے موقع پر کسانوں کی ٹریکٹر پریڈ میں اب کچھ ہی گھنٹوں کا وقت باقی ہے۔ دہلی بارڈر پر کسانوں نے اپنی تیاریاں تیز کر دی ہیں۔ سنگھو بارڈر، غازی پور بارڈر، چیلا بارڈر پر ٹریکٹروں کی تعداد تیزی کے ساتھ بڑھنے لگی ہے اور امکان ظاہر کیا جا رہا ہے کہ ہزاروں کی تعداد میں مزید ٹریکٹر آج نصف شب تک دہلی کی مختلف سرحدوں پر پہنچیں گے۔ قابل ذکر ہے کہ کسان تحریک کے پیش نظر یوم جمہوریہ ٹریکٹر پریڈ میں شامل ہونے کے لیے چھوٹے چھوٹے شہروں اور گاؤں سے کسان دہلی بارڈر کا رخ کر رہے ہیں۔ اس درمیان پنجاب میں تاجروں نے منڈیاں بند رکھ کر کسانوں کی حمایت کا عزم ظاہر کیا ہے۔