غلام نبی آزاد کا کانگریس سے علیحدہ ہونے کا اعلان، تمام ذمہ داریوں سے دستبردار
سینئر لیڈر غلام نبی آزاد نے کانگریس سے استعفیٰ دے دیا ہے۔ انہوں نے پارٹی کی بنیادی رکنیت اور تمام عہدوں سے دستبردار ہونے کا اعلان کیا ہے۔ آزاد نے کانگریس صدر سونیا گاندھی کو پانچ صفحات پر مشتمل مکتوب ارسال کرتے ہوئے اپنے جذبات کا اظہار کیا ہے۔
سونیا گاندھی کو بھیجے گئے استعفیٰ میں غلام نبی آزاد نے لکھا، ’’انتہائی افسوس اور بھاری دل کے ساتھ میں نے انڈین نیشنل کانگریس سے اپنے نصف صدی پرانے تعلقات کو توڑنے کا فیصلہ کیا ہے۔‘‘
عوامی مسائل پر ملک گیر مہم کے دوران غلام نبی آزاد کا استعفیٰ افسوسناک، کانگریس
غلام نبی آزاد کانگریس پارٹی کے ایک قابل احترام لیڈر تھے اور وہ مختلف اوقات میں کئی اہم عہدوں پر فائز رہے ہیں۔ افسوس کی بات یہ ہے کہ غلام نبی آزاد نے ایسے وقت میں پارٹی سے علیحدہ ہونے کا فیصلہ کیا جب کانگریس پارٹی مہنگائی اور بے روزگاری کے خلاف مودی حکومت کے خلاف تحریک چلا رہی ہے۔ ایسے وقت میں غلام نبی آزاد کو پارٹی اور عوام کی آواز بننا چاہئے تھا، یہ انتہائی تکلیف دہ ہے۔