زرعی قوانین واپس نہیں ہوئے تو خود کشی کر لونگا، راکیش ٹکیت کا بڑا اعلان

غازی پور بارڈر پر زبردست ہلچل کے درمیان کسان لیڈر راکیش ٹکیت نے بڑا اعلان کر دیا ہے۔ انہوں نے روتے ہوئے کہا کہ تحریک ختم نہیں ہوگی، اگر قوانین واپس نہیں ہوں گے تو وہ خود کشی کر لیں گے۔

بھاری تعداد میں پولیس اہلکار غازی پور بارڈر پہنچے، ٹکیت نے کہا- ’سرینڈر نہیں کرونگا‘

غازی پور بارڈر پر بھاری تعداد میں پولیس فورسز کو تعینات کیا گیا ہے۔ دھرنے کے مقام پر انتظامیہ کی ٹیم بھی موجود ہے۔ کچھ مقامی لوگ بھی یہاں موجود ہیں جو سڑک کو خالی کرانے کا مطالبہ کر رہے ہیں۔

دریں اثنا، راکیش ٹکیت نے کہا کہ وہ سرینڈر نہیں کریں گے اور ان کا دھرنا جاری رہے گا۔ راکیش ٹکیت نے کہا کہ لال قلعہ کے واقعہ کے لئے جو بھی ذمہ دار ہیں ان کی کال ڈیٹیل نکالی جائے۔ راکیش ٹکیت نے دعوی کیا کہ یوپی پولیس ان کو گرفتار کرنے کی کوشش کر رہی ہے جبکہ سپریم کورٹ نے بھی پر امن دھرنے کو جائز ٹھہرایا ہے۔

غازی پور بارڈر دھرنے کے مقام کو آج رات تک خالی کرنے کا غازی آباد انتظامیہ کا حکم

غازی آباد انتظامیہ نے غازی پور بارڈر پر دھرنا دے رہے کسانوں کو آج رات تک اس مقام کو خالی کرنے کا حکم دے دیا ہے۔ انتظامیہ کا کہنا ہے کہ وہ دھرنے کے مقام کو خالی کرانے کے لئے تیار ہیں۔ قبل ازیں، اطلاع موصول ہوئی تھی کہ گزشتہ شب کسانوں کے خیموں کی بجلی کاٹ دی گئی تھی جس کے بعد انہیں اندھیرے میں رات گزارنا پڑی تھی۔

دریں اثنا یوپی کے اے ڈی جی لا اینڈ آرڈر نے کہا، ’’26 جنوری کو پیش آنے والے افسوسناک واقعہ کے بعد کچھ کسان تنظیموں نے مرضی سے سے چلا بارڈر دلت پریرنا استھل سے تحریک واپس لے لی۔ باغپت میں لوگوں نے سمجھانے کے بعد انہوں نے رات میں دھرنا ختم کر دیا۔ یو پی گیٹ پر ابھی کچھ لوگ ہیں، ان کی تعداد کافی کم ہوئی ہے۔‘‘

لڑائی نظریات سے ختم ہوگی، لاٹھی-ڈنڈے سے نہیں، راکیش ٹکیت

کسان لیڈر راکیش ٹکیت نے کہا کہ اگر حکومت اس تحریک کو جاری رکھنے دینا نہیں چاہتی تو انہیں یہاں سے گرفتار کر لیا جائے۔ راکیش ٹکیت نے کہا کہ لفظ تشدد ان کی ڈکشنری میں ہی نہیں ہے، لال قلعہ میں جو کچھ بھی ہوا اسے تحریک سے منسلک کرنے کی کوشش کی گئی۔ انہوں نے کہا کہ انتظامیہ اپنی چال میں کامیاب رہی۔ راکیش ٹکیت نے کہا کہ یہ نظریات کی لڑائی ہے، نظریاتی انقلاب ہے، نظریات سے ہی ختم ہوگی، لاٹھی-ڈنڈے سے ختم نہیں ہوگی۔