کرناٹک: 10ویں جماعت کے نتائج کا اعلان، کامیابی کی شرح ٪71.80

بنگلورو: 10/اگست۔ محکمہ تعلیم نے آج جون-جولائی میں ہونے والے کرناٹک 10ویں جماعت (ایس ایس ایل سی) کے امتحانات کے نتائج کا اعلان کیا۔ ریاست میں مجموعی طور پر کامیابی کی شرح 71.80٪ ہے

رواں سال کرناٹک 10ویں جماعت کے امتحانات کوویڈ 19 وبائی امراض کے خوف کے درمیان منعقد ہوئے تھے اور پچھلے سال کے مقابلہ میں، ریاست میں کامیابی کے فیصد میں 1.9 فیصد کمی دیکھنے میں آئی ہے۔ 

امتحانات کے لئے رجسٹرڈ 8،48،203 امیدواروں میں سے 8،11،050 موجود تھے جنہوں نے امتحان لکھا اور ان میں سے 5،82،316 امتحان میں کامیاب بھی ہوگئے ہیں۔ 

کووڈ 19 کی وجہ سے 18،067 سے زیادہ طلباء غیر حاضر تھے اور انہیں تازہ امیدواروں کی حیثیت سے ضمیمہ کے دوران امتحانات میں شرکت کی اجازت ہوگی. اس کے علاوہ 19086 میں طلبہ کو حاضری کی کمی کی وجہ سے امتحانات میں شامل ہونے کی اجازت نہیں تھی۔

تاہم اس بار صنف کے فرق پر لڑکیوں نے غلبہ حاصل کیا۔ لڑکوں کا نتیجہ 66.41 فیصد ہے جبکہ لڑکیوں کا 77.74 فیصد ہے۔

امتحان میں شریک 4،25،352 لڑکوں میں سے 2،82،461 لڑکے کامیاب ہوئے۔ اسی طرح امتحان میں بیٹھنے والی 3،85،697 لڑکیوں میں سے 2،99،855 لڑکیاں کامیاب ہوگئیں۔

اس بار 6 طلبا نے 625 نمبرات میں سے 625 اسکور کیے۔ 68 طلباء نے 620 نمبرات حاصل کرتے ہوئے نیا ریکارڈ بنایا ہے۔