عیدگاہ بیدر میں نمازِعیدالاضحی نہیں ادا کی جاسکے گی: سکریٹری عیدگاہ کمیٹی بیدر
بیدر: 30/جولائی (پریس ریلیز) کوویڈ۔ 19کی قہرسامانیوں کو دیکھتے ہوئے مسلمانوں کی دوسری بڑی عید ”بقرعید“ کے پیش نظر محکمہ اقلیتی بہبود، حج اوراوقاف حکومت کرناٹک کی جانب سے ایک حکمنامہ جاری کرکے عیدگاہوں میں نماز عیداداکرنے پر پابندی عائد کرنے کی بات روزانہ اخبارات میں آرہی ہے۔دفتر عیدگاہ سنی محمد آباد بیدر موقوعہ روبرومقبرہ علی برید بیدر کو سرکاری حکمنامہ موصول ہواجس کانمبر MWD 02 MDS 2020 Dated 24-07-2020 ہے جس کے مطابق ریاست کرناٹک کی کسی بھی عیدگاہ میں نماز عیدالاضحی پرپابندی عائد کردی گئی ہے۔
چونکہ ریاست کی کسی بھی عیدگاہ میں نماز بقرعید نہیں ہوگی اسلئے افسوس کے ساتھ معزز اہلیان بیدر کو اطلاع دی جارہی ہے کہ کوروناوائرس کے بڑھتے ہوئے مثبت واقعات کے پیش نظر بید رکی قدیم عیدگاہ موقوعہ روبرو مقابرسلاطینِ بریدشاہان بیدر پر یکم اگست کو مذکورہ وجوہات کے سبب نماز عید کی ادائیگی نہ ہوسکے گی۔
یہ بات جناب محمد عامر پاشاہ سکریڑی عیدگاہ قدیم سنی محمد آباد بیدر نے ایک پریس نوٹ جاری کرکے بتائی ہے اور کہاہے کہ ماہ مارچ 2020 سے ملک بھر میں کورونا وباء کا باضابطہ آغازہوا۔حکومت نے ملک بھر میں لاک ڈاؤن نافذکردیا۔ لوگ اپنے گھروں میں بٹھا دئے گئے کیوں کہ اس مرض کے متعدی ہونے کی بات سامنے آئی تھی۔ لیکن افسوس کہ گذشتہ پانچ ماہ کے دوران ملک بھر میں ہزاروں جانیں اس وبا کی نذر ہوچکی ہیں۔ اسی درمیان میں نمازعیدالفطر بھی بیدر شریف اور ملک بھر کی عیدگاہوں میں ادا نہیں کی جاسکی۔ جو حکومت کاآرڈر تھا اور حالات ہی کچھ ایسے تھے کہ نمازعیدالفطرعیدگاہوں میں پڑھی نہ جاسکی۔ دنیا بھر میں پھیلی ہوئی اس وبا پر ابھی تک دنیا کی سوپر طاقتیں اور سائنسدا ن قابونہیں پاسکے ہیں۔
جنا ب محمد عامر پاشاہ نے حج سے متعلق اظہار خیال کرتے ہوئے پریس نوٹ میں لکھاہے کہ امسال حج کے لئے ہندوستان سے عازمین حج سعودی عرب کے شہر مکہ نہیں جاسکے ہیں جو ملت اسلامیہ ہند کے لئے ایک صدمہ سے کم نہیں ہے تاہم اللہ کی مشیت کو کون جان سکتاہے۔ موصوف نے اللہ تعالیٰ سے دعا کی ہے کہ اے اللہ! ہمیں توبہ کی توفیق دے کہ تیری ہی توفیق سے ہر کام بنتے ہیں اور اس کوروناوباء کو ختم کردے کہ تیرے سارے بندے اس سے پریشان اور ہیبت زدہ ہیں۔ مالک! ہم میں سے جنہیں تو نے اپنے باس بلالیاہے انہیں اپنے جوارِ رحمت میں جگہ دے اور جو بیمارہیں انھیں صحت ِ عاجلہ وکاملہ عطافرما۔ مولائے کریم! ہم توبہ کرتے ہیں۔ اور اقرار کرتے ہیں کہ ہم گناہگار ہیں۔ تو اپنے فضل اور اپنی رحمت سے ہمارے گناہوں کو معاف کرتے ہوئے اس وباء کے علاوہ حسد، جلن، بغض اورآپسی عداوت جیسی بیماریوں سے ہمیں چھٹکار ادلا۔ ہمیں ایک کردے تاکہ پرچمِ توحید تلے جمع ہوکر تیری ہی عظمت کے گن گاسکیں۔