راجیہ سبھا میں کورونا پر بحث جاری، اب تک کس نے کیا کہا؟

کورونا کی روک تھام کا قیمتی وقت برباد کر دیا گیا: غلام نبی

کانگریس کے رکن پارلیمنٹ غلام نبی آزاد نے کہا کہ حکومت نے کورونا کی روک تھام کے لئے جو اہم وقت تھا اسے برباد کر دیا۔ ڈبلیو ایچ او نے دسمبر 2019 میں وارننگ جاری کر دی تھی۔ جیسا کہ چین ہمارا پڑوسی ملک ہے، ہمیں پہلے ہی محتاط ہو جانا چاہئے تھا۔ راہل گاندھی نے بھی خبردار کیا تھا کہ یہ وبا ہم پر حاوی ہو جانے والی ہے۔

کیا چرخا چلانے سے آزادی ملی: سودھانشو تریویدی

بی جے پی کے رکن پارلیمنٹ سودھانشو تریویدی نے سنجے سنگھ کو جواب دیتے ہوئے کہا کہ جو لوگ یہ پوچھ رہے ہیں کی کیا تالی تھالی بجانے سے کورونا ختم ہو جائے گا، ان سے میں پوچھنا چاہتا ہوں کہ کیا چرخا چلانے سے آزادی ملی تھی۔ چرخا چلانا علامت تھی، ٹھیک اسی طرح تالی تھالی بجانا بھی ایک علامت تھی، جس کا مقصد لوگوں میں حوصلہ پیدا کرنا تھا۔

تالی تھالی سے کوئی ٹھیک ہوا ہو، ثابت کریں: سنجے سنگھ

عام آدمی پارٹی کے رکن پارلیمنٹ سنجے سنگھ نے کہا کہ کل سے ہی ایوان میں کورونا پر بحث ہو رہی ہے لیکن حکمران جماعت کے لوگ صرف الزام تراشیوں پر آمادہ ہیں۔ حکمران جماعت کے لوگ یہ کہہ رہے ہیں کہ اپوزیشن نے تالی-تھالی بجانے میں حکومت سے تعاون نہیں کیا۔ میں یہ کہنا چاہتا ہوں کہ ایسی کوئی تحقیق بتاؤ جس میں تالی تھالی بجانے سے کورونا ٹھیک ہوا ہو! پھر میں وزیر اعظم کے ساتھ تالی تھالی بجانے کو تیار ہوں۔ کورونا پر بحث کے دوران سنجے سنگھ نے یوپی حکومت کو نشانہ بنایا اور کہا کہ یوپی میں کورونا کٹ کے نام پر بھی گھوٹالہ کر لیا گیا ہے۔

کیا بھابی جی کا پاپڑ کھاکر لوگ ٹھیک ہو رہے ہیں؟ سنجے راؤت

راجیہ سبھا میں کورونا پر بحث کے دوران شیو سینا کے رکن پارلیمنٹ سنجے راؤت نے کہا کہ میں ایوان کے ارکان سے پوچھنا چاہتا ہوں کہ کورونا سے اب تک جو لوگ شفایاب ہوئے ہیں کیا وہ سب بھابی جی کا پاپڑ کھاکر ٹھیک ہوئے ہیں؟ یہ سیاسی لڑائی نہیں ہے، یہ لوگوں کی زندگی بچانے کی لڑائی ہے۔

انہوں نے کہا کہ میری ماں اور چھوٹا بھائی جو رکن اسمبلی ہے، وہ کورونا سے لڑ رہے ہیں۔ مہاراشٹر میں اب تک متعدد افراد شفایاب ہو چکے ہیں۔ دھاراوی میں آج صورت حال قابو میں ہے۔ عالمی ادرہ صحب بھی بی ایم سی کی تعریف کر چکا ہے۔