دہلی تشدد منصوبہ بند سازش، پی ایم مودی اور امت شاہ ذمہ دار: سرجے والا

کانگریس ترجمان رندیپ سنگھ سرجے والا نے ایک بیان میں کہا ہے کہ دہلی میں ہوئے تشدد اور توڑ پھوڑ کے لیے پی ایم مودی اور وزیر داخلہ امت شاہ ذمہ دار ہیں۔ رندیپ سنگھ سرجے والا نے کہا کہ ’’یہ ایک سوچی سمجھی سازش کے تحت کی گئی کارروائی ہے۔ دہلی پولس ان شورش پسندوں پر مقدمہ درج کرنے کی جگہ سنیوکت کسان مورچہ کے لیڈروں پر مقدمہ درج کر رہی ہے۔‘‘ انھوں نے مزید کہا کہ دہلی تشدد انٹلیجنس کی ناکامی ہے اور امت شاہ کو وزیر داخلہ کے عہدہ سے استعفیٰ دینا چاہیے۔

کل جو دہلی میں ہوا وہ مرکزی حکومت کی سازش تھی: ابھے چوٹالہ

آئی این ایل ڈی لیڈر ابھے چوٹالہ نے آج ایک بیان میں کہا کہ ’’جو کسان لیڈر تحریک کی قیادت کر رہے تھے، ان کے خلاف مرکز کی مودی حکومت نے مقدمے درج کیے۔ کل دہلی میں جو ہوا وہ مرکزی حکومت کی سازش تھی۔‘‘ قابل ذکر ہے کہ ابھے چوٹالہ نے کسان تحریک کی حمایت میں رکن اسمبلی عہدہ سے استعفیٰ دے دیا ہے۔