مولانا حامد محمد خان امیر حلقہ جماعت اسلامی ہند حلقہ تلنگانہ کا پیغام، عامتہ المسلمین کے نام

تقویٰ پرہیز گاری اور رجوع الی اللہ کی کیفیات رمضان کے بعد بھی جاری رہیں

حیدرآباد: 2/مئی (پی این) عیدالفطر کے موقع پر مولانا حامد محمد خان امیر حلقہ جماعت اسلامی ہند حلقہ تلنگانہ نے عامتہ المسلمین سے اپیل کی کہ ماہ صیام کے دوران جس طرح ہر مومن مسلمان نے تقوی‘ پرہیز گاری اور رجوع الی اللہ کے علاوہ محتاجوں اور ضرورت مندوں کے ساتھ ہمدردی‘ مواساۃ اور امداد کا مظاہرہ کیا۔ ماہ صیام کے بعد بھی ان اعمال کو اسی طرح جاری و ساری رکھیں۔ انہوں نے کہا کہ ماہ صیام سال کے بقیہ ایام میں بندے کو خدا سے جوڑے رکھنے‘ اللہ تعالیٰ کی مکمل اطاعت کرنے اور خدمت خلق جیسے عظیم کام کو انجام دینے کی تربیت دیتاہے۔ ایسے ہی اہل ایمان کے لئے اللہ تعالیٰ نے اجر عظیم کا وعدہ فرمایاہے۔

مولانا حامد محمد خان نے فرمایا کہ اس مرتبہ عید الفطر‘ تعصب اور مسلم دشمنی کے ماحول میں خوشی و مسرت کا پیغام لے کر آئی ہے۔ اہل ایمان کی ذمہ داری ہے کہ وہ عید الفطر کی خوشیوں کو برادران وطن کے ساتھ بانٹیں تا کہ نفرت‘ تعصب اور فرقہ واریت کے زہر کو روکا جا سکے اور اسلام اورمسلمانوں کی دشمنی میں جو عناصر پیش پیش ہیں اُن کو یکا و تنہا کیا جاسکے۔

آخر میں انہوں نے اس ایقان کا اظہار کیا کہ اہل ایمان اگر سیسہ پلائی ہوئی دیوار بن جائیں تو یہ مصائب آلام اور آزمائیشوں کا سلسلہ خود بہ خود ختم ہو جائے گا۔اس موقع پر امیر حلقہ مولانا حامد محمد خان نے عالم اسلام کے تمام مسلمانوں کو عید الفطر کی مبارک باد پیش کی۔