چٹگوپہ میں ہوگا 2 روزہ سالانہ عرس، کم عمر بچوں اور خواتین کی شرکت پر پابندی

بیدر: 5/ اگست(اے ایس ایم) درگاہ حضرت سیّد نور محمد پاشاہ توکلی مرزائی چشتی القادری قلندری ؒ المعروف باحضرت سیّد پاشاہ توکلی ؒ چٹگوپہ شریف بیلکھیرکراس تعلقہ چٹگوپہ ضلع بیدر کا 14واں سالانہ دوروزہ عرس شریف نہایت ہی عقیدت واحترام کے ساتھ منایا جائیگا۔27/ذی الحجہ م 7/اگست بروزہفتہ بعد نماز مغرب غسل شریف کی رسومات کے ساتھ صندل شریف کاآغازہوگا۔

تفصیلات کے بموجب حسب عمل روایت 8اگست مطابق 28/ذی الحجہ بروزاتواربعدادائیگی نمازظہر صندل مبارک حجرہ حضرت ممدوح ؒ(قیام گاہ) سے برآمد ہوکر درگاہ حضرت ممدوح پہونچے گا۔

مسجد احاطہ درگاہ شریف میں ادائیگی نماز عصر کے بعد پیرطریقت جناب سیّد عزیز احمد توکلی مرزائی چشتی القادری قلندری سجادہ نشین و متولی درگاہ حضرت ممدوح ؒ، جمیع علمائے مشائخین عظام، عقیدت مندان مریدین و معتقدین کی موجودگی میں رسومات صندل مالی کی جملہ خصوصی خدمات انجام دینگے۔ اسی شب بعدنماز عشاء محفل سماع منعقد ہوگا۔ ساز پر ممتاز قوال نعتیہ،منقبتی و عرفانی کلام پیش کرنے کی سعادت حاصل کرینگے۔

9/اگست بروزپیر بعد نمازفجرتاقبل از نمازظہر صبح تا نصف النہا ر طعا م ہو گا۔ بعدنماز ظہر جلسہ جشن چراغاں و سماع، بعدنماز عصر فاتحہ خوانی و پیش کشی چادر گل و تقسیم تبرکات ہونگے۔ عقیدت مندان، مریدین اور معززین کی سہولت کے لیے بہترین انتظامات کئے گئے ہیں۔ تمام عقیدت مندان سے عرس وصندل شریف میں شرکت کی منتظمین عرس شریف نے شرکت کی گذارش کی ہے۔ کووڈ19احکامات کی روشنی میں 10سال سے کم عمر بچے اور خواتین کو صندل تقریب میں شرکت کی اجازت نہیں ہو گی۔