کورونا سے ہندوستان میں اب تک ہوئی 5 اموات، متاثرین کی کل تعداد 200 سے زیادہ

ملک میں کورونا وائرس سے ایک اور شخص کی موت ہوگئی ہے۔ ایک اطالوی شہری علاج کے دوران راجستھان کے جے پور میں فوت ہوگیا۔ کرونا سے اب ملک میں اموات کی تعداد پانچ ہو گئی ہے

ملک میں کورونا وائرس کے مریضوں کی تعداد میں مسلسل اضافہ ہو رہا ہے اور تازہ ترین اطلاعات کے مطابق کورونا وائرس کی وجہ سے ملک میں پانچویں موت واقع ہوئی ہے۔ میڈیا رپورٹ کے مطابق کورونا وائرس کی وجہ سے ملک میں پانچویں موت راجستھان میں ہوئی ہے۔ متاثرہ شخص اٹلی کا رہائشی تھا جسے سوائی مان سنگھ اسپتال کے آئسولیشن وارڈ میں رکھا گیا تھا۔ وہیں کورونا وائرس سے متاثرہ افراد کی تعداد 200 سے زیادہ ہو گئی ہے۔

ادھر، جمعہ کے روز یو پی کی راجدھانی لکھنؤ میں 4 نئے مریض کورونا وائرس کی جانچ میں مثبت پائے گئے ہیں۔ لکھنؤ کے ’کے جی ایم یو‘ اسپتال میں کل 9 مریض زیر علاج ہیں۔ خیال رہے کہ کورونا وائرس ملک کی 20 ریاستوں میں پھیل چکا ہے اور متاثرین کی تعداد مہاراشٹر میں سب سے زیادہ ہے۔

مہاراشٹر میں مزید تین افراد میں کورونا وائرس کی تصدیق ہو گئی ہے، جس کے بعد مہاراشٹر میں مریضوں کی تعداد بڑھ کر 52 ہو گئی ہے۔ دوسری طرف، دہلی انٹرنیشنل ایئرپورٹ لمیٹڈ کی جاب سے کہا گیا ہے کہ تمام بین الاقوامی پروازیں 22 مارچ سے 29 مارچ تک معطل رہیں گی۔

واضح رہے کہ ہندوستان میں کورونا وائرس کے کل مثبت 201 معاملات میں سے 20 میں مریض صحت یاب ہو چکے ہی۔ وہیں ملک میں اس مہلک کورونا وائرس کی وجہ سے 5 افراد کی موت ہو چکی ہے اور 176 افراد اس وائرس سے لڑ رہے ہیں۔ ہندوستان میں اب تک پنجاب، دہلی، مہاراشٹرا، کرناٹک اور راجستان میں ایک ایک شخص کورونا وائرس کی وجہ سے فوت ہوا ہے۔

سب سے زیادہ متاثرہ مہاراشٹر میں کورونا وائرس کے انفیکشن کے کیسز کی تعداد میں مسلسل اضافہ ہو رہا ہے۔ ریاست میں 44 ہندوستانی اور 3 غیر ملکی مریض ہیں۔ تشویش ناک بات یہ ہے کہ یہاں کا کوئی مریض تاحال صحت یاب نہیں ہو سکا ہے۔