ارون جیٹلی نے کیا ’ریٹائرمنٹ‘ کا اعلان: مودی کو کہا ’نہیں بننا چاہتا وزیر‘

این ڈی اے حکومت کی پہلی مدت کار میں وزیر مالیات رہے ارون جیٹلی نے پی ایم مودی کو خط لکھا ہے۔ انھوں نے اس میں کہا ہے کہ نئی حکومت میں انھیں کوئی ذمہ داری نہیں چاہیے کیونکہ وہ اگلی حکومت کو وقت نہیں دے پائیں گے۔ اس کے لیے ارون جیٹلی نے اپنی خراب صحت کا حوالہ دیا ہے۔

جیٹلی نے خط میں آگے لکھا ہے کہ ’’گزشتہ 18 مہینوں سے میں کچھ سنگین صحت مسائل سے نبرد آزما ہوں۔ میرے ڈاکٹرس نے زیادہ تر بیماریاں ٹھیک کر دی ہیں۔ جب انتخابی تشہیر ختم ہو گئی تھی اور آپ کیدارناتھ کے لیے نکل رہے تھے تو میں نے آپ کو زبانی طور پر اپنی بیماری کے بارے میں بتایا تھا۔ میں نے آپ کو یہ بھی بتایا تھا کہ تشہیر کے دوران مجھے دی گئی ذمہ داریاں نبھانے میں تو میں کامیاب رہا، لیکن مستقبل میں کچھ وقت کے لیے ذمہ داری سے بچنا چاہوں گا۔‘‘

گزشتہ کئی دنوں سے ارون جیٹلی کی صحت کو لے کر سوشل میڈیا پر قیاس آرائیاں ہو رہی ہیں۔ سوشل میڈیا پر ان کو لے کر کئی طرح کی خبریں بھی وائرل ہوئی تھیں جس کے بعد حکومت نے آگے آ کر خود صفائی دی تھی اور کہا تھا کہ ’’میڈیا کے ایک طبقے میں مرکزی وزیر ارون جیٹلی کی صحت کو لے کر جو خبریں چل رہی ہیں وہ پوری طرح غلط اور بے بنیاد ہیں۔‘‘

ارون جیٹلی کی بیماری کی بات کریں تو وہ اسی سال جنوری میں علاج کے لیے امریکہ کے نیو یارک گئے تھے۔ جیٹلی کی 14 مئی 2018 کو گردے کی ٹرانسپلانٹیشن سرجری ہوئی تھی۔ ان کی غیر حاضری کے دوران پیوش گویل کو وزارت مالیات کی اضافی ذمہ داری سونپی گئی تھی۔