مہنت نریندرگری کے ساتھ لڑکی کی تصویر وائرل کرنے والا تھا آنند گری، خودکشی نوٹ میں انکشاف

مہنت نریندر گری کے خودکشی نوٹ نے کئی طرح کی باتیں صاف کر دی ہیں، اس نوٹ میں ایک جگہ پر مہنت نے شاگرد آنند گری اور لیٹے ہنومان مندر کے پجاری ادیا تیواری پر سنگین الزامات عائد کیے ہیں۔

اتر پردیش کے پریاگ راج میں پیر کی شام اکھل بھارتیہ اکھاڑا پریشد کے صدر مہنت نریندر گری کی مشتبہ حالت میں موت کے بعد ان کا 8 صفحات پر مبنی خودکشی نوٹ سامنے آیا ہے۔ اس خودکشی نوٹ میں انھوں نے شاگرد آنند گری، لیٹے ہنومان مندر کے پجاری اَدیا تیواری اور اس کے بیٹے سندیپ تیواری کو اپنی موت کے لیے ذمہ دار ٹھہراتے ہوئے پولیس انتظامیہ سے کارروائی کا مطالبہ کیا ہے۔

خودکشی نوٹ میں مہنت نریندر گری نے لکھا ہے ’میں مہنت نریندر گری 13 ستمبر 2021 کو خودکشی کرنے جا رہا تھا۔ لیکن ہمت نہیں کر پایا۔ آج آنند گری کی وجہ سے بہت پریشان ہو گیا۔ آج ہریدوار سے خبر ملی کہ ایک دو دن میں آنند موبائل کے ذریعہ سے کسی خاتون یا لڑکی کے ساتھ غلط کام کرتے ہوئے تصویر وائرل کر دے گا۔ سوچا تھا صفائی دوں، لیکن بدنامی کا خوف تھا۔ میں جس عزت کے ساتھ جی رہا ہوں، بدنامی میں کیسے جیوں گا۔ اس سے غمزدہ ہو کر میں خودکشی کرنے جارہا ہوں۔‘‘

اس خودکشی نوٹ کے صفحہ 2 پر لکھا ہے ’’میں خودکشی کرنے جارہا ہوں۔ میری موت کی ذمہ داری آنند گری، اَدیا پرساد تیواری، سندیپ تیواری ولد اَدیا پرساد تیواری کی ہوگی۔ میں پریاگ راج کے سبھی پولس اور انتظامی افسران سے گزارش کرتا ہوں کہ میری موت کے ذمہ دار مذکورہ لوگوں پر کارروائی کی جائے، تاکہ میری روح کو سکون مل سکے۔‘‘

مہنت نریندر گری نے اپنے خودکشی نوٹ کی شروعات ’میں مہنت نریندر گری‘ الفاظ کے ساتھ کی ہے اور ہر صفحہ پر نیچے اپنا نام اور تاریخ لکھتے ہوئے دستخط کیا ہے۔ خودکشی نوٹ کے ہر صفحہ پر مہنت نریندر گری نے اپنی پریشانی کھل کر لکھنے کی کوشش کی ہے۔ وصیت کی طرح لکھے اس نوٹ میں نریندر گری نے ہدایت دیتے ہوئے یہ بھی لکھا ہے کہ ’’پیارے بلویر مٹھ مندر کے انتظام کی کوشش ویسے ہی کرنا جیسے میں نے کیا ہے۔ آشوتوش گری، نتیش گری اور مندر کے سبھی مہاتما کا تعاون کرنا۔‘‘