اتراکھنڈ سیاسی ہلچل: پشکر سنگھ دھامی 4 جولائی کی شام لیں گے CM عہدہ کا حلف

اتراکھنڈ کے نئے وزیر اعلیٰ بننے جا رہے پشکر سنگھ دھامی نے گورنر بے بی رانی موریہ سے ملاقات کر کے قانون ساز پارٹی کا لیڈر منتخب کیے جانے کی اطلاع دے دی ہے۔ میڈیا ذرائع سے موصول ہو رہی خبروں کے مطابق دھامی وزیر اعلیٰ عہدہ کا حلف 4 جولائی کی شام تقریباً 5 بجے لیں گے۔ قابل ذکر ہے کہ کھٹیما اسمبلی حلقہ سے دو بار رکن اسمبلی رہ چکے دھامی کے نام کی تجویز قانون ساز پارٹی کی میٹنگ کے دوران تیرتھ سنگھ راوت نے رکھی تھی۔ راوت نے آئینی بحران سے بچنے کے لیے 2 جولائی کی شب گورنر کو اپنا استعفیٰ نامہ سونپ دیا تھا۔

پشکر سنگھ دھامی ہوں گے نئے وزیر اعلیٰ، بی جے پی قانون ساز پارٹی کے اجلاس میں فیصلہ

اتراکھنڈ میں تیرتھ سنگھ راوت کے استعفی کے بعد منعقد ہونے والے قانون ساز پارٹی کے اجلاس کے دوران پشکر سنگھ دھامی کو قانون ساز پارٹی کا نیا قائد منتخب کر لیا گیا ہے۔ اس طرح چار مہینے کے بعد ہی ریاست کو ایک نیا وزیر اعلیٰ مل گیا ہے۔

سال 2022 کے انتخابی الیکشن میں بی جے پی کی جیت ہوگی، تیرتھ سنگھ راوت

اپنے وزیر اعلیٰ کے عہدے سے استعفی دینے والے تیرتھ سنگھ راوت نے دعویٰ کیا ہے کہ اتراکھنڈ کے آئندہ 2022 میں ہونے والے اسمبلی انتخابات میں جیت بی جے پی کی ہوگی۔ خیال رہے کہ تیرتھ سنگھ کے استعفیٰ دینے کے بعد نئے وزیر اعلیٰ کے کے لئے اتراکھنڈ کی راجدھانی دہرادون میں سیاسی ہلچل تیز ہو گئی ہے۔ بی جے پی قانون ساز پارٹی کا اجلاج تین بجے طلب کیا گیا ہے جس میں نئے قائد کا انتخاب ہوگا۔

تیرتھ استعفیٰ نہیں دیتے تو آئینی بحران کھڑا ہو جاتا، میں وزیر اعلیٰ کی دوڑ میں نہیں ہوں، تریویندر سنگھ

اتراکھنڈ کے سابق وزیر اعلیٰ تریویندر سنگھ راوت نے تیرتھ سنگھ راوت کے استعفیٰ پر وضاحت پیش کی ہے۔ انہوں نے کہا کہ ’’اگر وہ (تیرتھ سنگھ راوت) استعفی نہیں دیتے تو اس سے آئینی بحران کھڑا ہو جاتا۔ کچھ ریاستوں میں ضمنی انتخابات کورونا کی وجہ سے تاخیر کا شکار ہو گئے ہیں۔ آج قانون ساز پارٹی کے اجلاس میں قائد کا انتخاب ہو جائے گا۔‘‘

خود کے وزیر اعلیٰ کی دوڑ میں شامل ہونے کے سوال پر تریویندر سنگھ راوت نے کہا، ’’میں کبھی دوڑ کا حصہ نہیں رہا، آج بھی نہیں ہوں۔ لیڈر کا فیصلہ آج کے قانون ساز پارٹی کے اجلاس میں ہی ہوگا۔‘‘

اسمبلی انتخابات میں ہم کانگریس سے زیادہ سیٹیں حاصل کریں گے، بی جے پی لیڈر اجے بھٹ

اتراکھنڈ میں سال 2022 میں ہونے والے اسمبلی انتخابات کے تعلق سے بات کرتے ہوئے بی جے پی رکن پارلیمنٹ اجے بھٹ نے کہا، ’’بی جے پی عوام کی حفاظت اور بہتری سے کبھی سمجھوتہ نہیں کرتی۔ پہلے قوم، پھر پارٹی اور آخر میں ہمارا مقصد آتا ہے۔ ہم کانگریس سے زیادہ سیٹیں حاصل کریں گے۔ ووٹوں کی گنتی کے دوران انہیں جواب مل جائے گا۔‘‘

اتراکھنڈ معاملہ: کورونا کی وجہ سے الیکشن کرانا درست نہیں تھا، اس لئے استعفیٰ دینا ہی بہتر تھا، ریاستی بی جے پی صدر

اتراکھنڈ بی جے پی کے ریاستی صدر مدن کوشک نے کہا، ’’سپروائزر اور انچارج کے 10.30 بجے دہرادون پہنچنے کے بعد قانون ساز پارٹی کا اجلاس 3 بجے منعقد ہوگا۔ اس کے بعد حکومت سازی کے لئے گورنر سے ملاقات کریں گے۔ ممکن ہے ہے وزیر اعلیٰ ارکان سمبلی میں سے ہی کوئی ایک ہوگا۔‘‘

مدن کوشک نے مزید کہا، ’’الیکشن کمیشن کو الیکشن کرانے میں کوئی مسئلہ نہیں ہے لیکن کورونا کی وجہ سے یہ صحیح نہیں ہے۔ ایسے حالات میں استعفی پیش کرنا ہی بہتر تھا۔‘‘