سابق مرکزی وزیر اور کانگریس لیڈر بوٹا سنگھ کا انتقال، وزیراعظم مودی اور راہول گاندھی کااظہارِ تعزیت

نئی دہلی: کانگریس کے سینئر رہنما اور سابق مرکزی وزیر سردار بوٹا سنگھ کا ہفتہ کے روز یہاں انتقال ہوگیا۔ وہ 86 سال کے تھے ۔ ان کی فیملی میں اہلیہ، دو بیٹے اور ایک بیٹی ہے۔

سردار بوٹا سنگھ 21 مارچ 1934 کو پنجاب کے ضلع جالندھر کے گاؤں مصطفیٰ پور میں پیدا ہوئے ، بوٹا سنگھ سیاست میں آنے سے پہلے صحافت سے وابستہ تھے۔ انہوں نے پہلا الیکشن اکالی دل سے جیتا تھا ، بعد میں وہ کانگریس میں شامل ہوگئے۔

آنجہانی بوٹا سنگھ نے آٹھ بار لوک سبھا کا انتخاب جیتاتھا ۔ مرکزی وزیر کی حیثیت سے انہوں نے داخلہ ، زراعت ، ریلوے اور مواصلات اور دیگر اہم وزارتوں کے ساتھ بہار کے گورنر کی ذمہ داری بھی نبھائی۔ وہ ڈاکٹر منموہن سنگھ کے دور حکومت میں قومی درج فہرست ذات و قبائل کمیشن کے چیئرمین (2007 سے 2010 ) بھی رہے تھے۔

وزیر اعظم نریندر مودی نے کیا تعزیت کا اظہار

وزیر اعظم نریندر مودی نے کہا، ’’بوٹا سنگھ جی غریبوں اور پسماندگان کی بہبود کے لئے ایک تجربہ کار منتظم اور بااثر آواز تھے۔ ان کے انتقال پر میں رنجیدہ ہوں۔ ان کے اہل خانہ اور حامیوں سے میری تعزیت۔‘‘

راہل گاندھی کی تعزیت

راہل گاندھی نے ٹوئٹر پر لکھا، ’’سردار بوٹا سنگھ جی کے انتقال سے ملک نے ایک سچا عوامی خدمت گار اور وفادار رہنما کھو دیا۔ انہوں نے اپنی پوری زندگی ملک کی خدمت اور عوام کی بہبود کے لئے وقف کر دی، جس کے لئے انہیں ہمیشہ یاد رکھا جائے گا۔ اس مشکل وقت میں ان کے اہل خانہ کو میری تعزیت۔‘‘