ہبلی: پاکی و صفائی کے متعلق بیداری لانے جماعت اسلامی نے منائی صفائی مہم

ہبلی: 28/ اکتوبر(ایس ایم) ماہ ربیع الاول کی مناسبت سے جماعت اسلامی ہند 15/ روزہ ریاست گیر مہم منارہی ہے۔ مہم کا آغاز 23/ اکتوبر کو ہوا اور 5/ نومبر تک یہ جاری رہے گی۔ اس کا عنوان ”حضرت محمد ؐ: انسانیت کے رہنماء“ ہے جس کے تحت مختلف پروگرام تشکیل دیئے گئے ہیں۔ اس دوران عوام الناس میں پاکی و صفائی کے متعلق بیداری لانے صفائی مہم منائی گئی۔

جماعت اسلامی ہند، ہبلی نے یہاں آنند نگر اردو اسکول پہنچ کر صفائی بیداری مہم چلائی۔ ارکان و کارکنان(مرد و خواتین) نے مل کر علاقہ کے راستوں میں صفائی کے کام کو انجام دیا۔ انہوں نے گھر گھر جاکر لوگوں میں پاکی و صفائی کے متعلق اہم معلومات دیں اور اس کی اہمیت کو اجاگر کیا۔ اس موقع پر ناظمہ ساجد النساء لالمیہ نے بتایا کہ مہم کے دوران دانشوروں سے ملاقات، بین الاقوامی اجلاس اور مختلف دیگر پروگرام طئے گئے ہیں۔ان کا کہنا تھا کہ اسلام میں پاکی و صفائی کو بہت اہمیت دی گئی ہے یہاں تک کہ پاکی کو آدھا ایمان قرار دیا گیا ہے۔

مہم کے دوران لوگوں میں بالخصوص عورتوں میں پاکی صفائی کے متعلق بیداری لائی جارہی ہے۔راستوں سے ضرر اشیاء کو دور کرنا اور راستوں کی صفائی کے کام کو حقیر نہیں جاننا چاہئے۔ کیونکہ حضور اکرم ؐ نے بھی راستوں سے ضرر اشیاء کو ہٹانے، صفائی کو قائم رکھنے کی تعلیمات دی ہیں اور اسے ثواب کا ضامن قرار دیا ہے۔لہٰذا اس موقع پر جماعت اسلامی ہند کے مر د وخواتین نے علاقہ میں صفائی کے مختلف کام انجام دیئے اور پاکی صفائی کی اہمیت کواجاگر کیا۔