میراروڈ: غیر مسلم برادران وطن کے لئے ‘مسجد کا تعارف’ پروگرام کا اہتمام

ممبئی: 7/اکتوبر (پریس ریلیز)میراروڈ کی سناء مسجد میں ملت ویلفیئر ایسوسی ایشن میراروڈ کے ساتھ مل کر جماعت اسلامی ہند اورایس آئی او میراروڈ کی جانب سے غیر مسلم برادران وطن کے لئے ‘ مسجد پریچئے ‘ پروگرام کا انعقاد کیا گیا۔ اس طریقے کے پروگرام کا انعقاد میراروڈ میں پہلی دفعہ عمل میں آیا۔ اس خصوصی پروگرام میں تقریبا 50 سے زائد ہندو و کرسچن برادران وطن نے کافی دلچسپی کے ساتھ شرکت کی۔

پروگرام میں شریک ہونے والے تمام حضرات کا استقبال ایک بہت ہی انوکھے انداز میں  پھولوں، کھجوروں اور عطر کے ذریعے کیا گیا ۔ اور پھر ڈاکٹر پرویز صاحب نے اس پروگرام کے مقصد سے تمام لوگوں روشناس کرایا، اور اس بات پر بھی روشنی ڈالی کہ آج پورے ملک بھر میں جو فرقہ وارانہ ہم آہنگی کا ماحول بنا کر لوگوں کے دلوں خوف اور نفرت کے بیج بوئے جارہے ہیں تو ایسے وقت میں ہمیں برادران وطن تک بھائی چارگی اور محبت کا پیغام عام کرنے کے لئے اس پروگرام کا انعقاد عمل میں لایا گیا ۔

بعدازاں ڈاکٹر صاحب نے تمام لوگوں کو مسجد کا دورہ کرواتے ہوئے نماز کا طریقہ، وضو کا طریقہ، دعائیں، قرآن مجید اور بھی کئی بنیادی چیزوں کے تعلق سے بہت ہی خوبصورت انداز میں مختصر سی باتیں بتائیں اور عملی نمونہ پیش کیا ۔ پھر برادر رافد شہاب نے لوگوں سے خطاب فرماتے ہوئے کہا کہ مسجد صرف مسلمانوں کے لئے نہیں ہے، اور انہوں نے پروگرام کی اہمیت بتاتے ہوئے کہا کہ ہم برادران وطن کو براہ راست مسجد میں بلائیں اور مسجد کا تعارف پیش کریں ۔

پروگرام میں شریک کئی حضرات نے سوالات  بھی کئے جس کے اطمینان بخش جوابات دئیے گئے، پروگرام کے اختتام میں تمام حضرات کو بنیادی اسلامی لٹریچر تحفے کے طور پر دیا گیا ۔ پروگرام کے دوران لوگوں کے لئے ناشتے وغیرہ کا بھی انتظام کیا گیا تھا ۔ اس موقع پر ڈاکٹر پرویز صاحب( رکن جماعت اسلامی ہند، میراروڈ )، برادر رافد شہاب( پروگرام کنوینر و صدر ایس آئی او، میراروڈ ) بطور مہمان خصوصی مدعو کئے گئے تھے ۔