بیدرمیں جلسۂ تقسیم اسناد و اصلاح معاشرہ سے صدر آل انڈیا مسلم پرسنل لاء بورڈ مولانا خالد سیف اللہ رحمانی کا خطاب

بیدر: 6/جولائی (اے این) خلیل احمد سکریٹری مدرسہ عربیہ تعلیم القرآن للبنات بیدر کی اطلاع کے بموجب آج بروز جمعرات 6 جولائی 2023ء بمقام مغل گارڈن میں مدرسہ ہذا کا جلسہ تقسیم اسناد و اصلاح معاشرہ منعقد ہوا۔

مولانا خالد سیف اللہ رحمانی سرپرست مدرسہ ہذا و صدر آل انڈیا مسلم پرسنل لاء بورڈ نے اپنے صدارتی خطاب میں کہا کہ آج کے پر فتن دور میں خواتین کی دینی تعلیم و تربیت کے لیے مدرسہ میں ہمہ جہت جز وقتی و کل وقتی تعلیم کا نظم ہے۔ جس سے اب تک 1100 سو سے زائد طالبات نے مدرسہ میں داخلہ لے کر دینی، علمی و روحانی استفادہ کیا ہے۔ خواتین کو حصول ِ علم کی ترغیب دیتے ہوئے مولانا نے کہا کہ قرون اولیٰ میں خواتین گراں قدر علمی کارنامے انجام دئیے ہیں، حضرت عائشہ ؓ سے دو ہزار دو سو دس (2210) حدیثیں مروی ہیں۔

مولانا شکیل احمد حسامی صدر تحفظ ختم نبوت شاخ بیدر نے اپنے خیالات کا اظہار کرتے ہوئے فرمایا کہ مرد حضرات کا اپنی بیوی اور بچوں کی تربیت کے لیے وقت دینا انتہائی ضروری ہے۔ مدرسہ ہذا سے عالمہ کورس مکمل کرنے والی 13 طالبات کے سرپرستوں کو صدر جلسہ کے ہاتھوں سندِ فراغت دی گئی۔

شہ نشیں پر وزیر الدین سیٹھ چیر مین مدرسہ ہذا، خلیل احمد سکریٹری مدرسہ ہذا، عبد الحنان سیٹھ خازن مدرسہ ہذا، ڈاکٹر عبد القدیر رکن آل انڈیا مسلم پرنل لاء بورڈ، عبد الغنی خان صدر جمعیت علماء ہند ضلع بیدر، فیاض احمد H.K.G.N، مفتی عبد الجلیل قاسمی، مفتی محمد عزیر مظاہری ندوی موجود تھے۔ مفتی وسیم جعفر رشادی نے نظامت کے فرائض بحسن و خوبی انجام دئیے۔ مردو خواتین کی کثیر تعداد موجود تھی۔