پارلیمنٹ پر کورونا کا سایہ! MP دانش علی متاثر، کل پارلیمنٹ کے اجلاس میں رہے تھے حاضر
کنور دانش علی نے ٹوئٹ کیا کہ کورونا ویکسین کی پوری خوراکیں لگوانے کے باوجود آج میں کورونا پازیٹو پایا گیا ہوں۔ گزشتہ روز میں پارلیمنٹ میں حاضر رہا تھا
نئی دہلی: کورونا کے اومیکرون ویرینٹ کے خطرے کے درمیان خبر ہے کہ کورونا پارلیمنٹ تک بھی پہنچ گیا ہے۔ بہوجن سماج پارٹی (بی ایس پی) کے امروہہ سے رکن پارلیمنٹ کنور دانش علی کورونا پازیٹو پائے گئے ہیں۔ انہوں نے خود ٹوئٹ کر کے اس کی اطلاع دی ہے۔ تشویش ناک بات یہ ہے کہ کنور دانش علی گزشتہ روز پارلیمنٹ کے سرمیائی اجلاس میں شامل رہے تھے۔ ایسے حالات میں دیگر ارکان پارلیمنٹ پر بھی کورونا سے متاثر ہونے کا خطرہ بڑھ گیا ہے۔
کنور دانش علی نے ٹوئٹ کیا، ’’کورونا ویکسین کی پوری خوراکیں لگوانے کے باوجود آج میں کورونا پازیٹو پایا گیا ہوں۔ گزشتہ روز میں پارلیمنٹ میں حاضر رہا تھا۔ میری درخواست ہے کہ میرے رابطہ میں آنے والے تمام افراد خود کو الگ تھلگ کر لیں اور اپنا ٹیسٹ کرا لیں۔ مجھ میں کورونا کی ہلکی علامات ظاہر ہو رہی ہیں، امید ہے کہ میں جلد شفایاب ہو جاؤں گا۔‘‘
دانش علی نے ٹوئٹ کے ساتھ لوک سبھا اسپیکر اور لوک سبھا کے سکریٹریٹ کو بھی ٹیگ کیا ہے۔ خیال رہے کہ ملک میں اومیکرن ویرینٹ تیزی سے پھیل رہا ہے اور ملک بھر میں اس کے مریضوں کی تعداد 200 سے تجاوز کر گئی۔ دہلی اور ممبئی میں اومیکرون کے سب سے زیادہ 54-54 کیسز کی تصدیق کی گئی ہے۔