جھنڈا لگاتے وقت بڑا حادثہ، کرین ٹوٹنے سے 3 ہلاک، 2 شدید زخمی

حادثہ گوالیر ضلع کے مہاراج باڑا علاقہ میں اس وقت ہوا جب کرین کی مدد سے تاریخی پوسٹ آفس بلڈنگ پر ترنگا پرچم لگایا جا رہا تھا۔

مدھیہ پردیش کے گوالیر میں ہفتہ کی صبح ایک بڑا حادثہ سرزد ہوا جس کے بعد وہاں لوگوں میں غم و اندوہ کی لہر دوڑ گئی ہے۔ موصولہ اطلاعات کے مطابق مہاراج باڑے پر فائر بریگیڈ کی ہائیڈرولک مشین ٹوٹنے سے تین لوگوں کی دردناک موت ہو گئی۔ اس حادثہ میں 2 لوگ سنگین طور پر زخمی بھی ہوئے ہیں۔ حادثہ کے بعد علاقے میں چیخ و پکار مچ گئی۔ مقامی لوگوں نے فوراً ایمبولنس کو بلایا اور زخمیوں کو نزدیکی ضلع اسپتال میں داخل کرایا۔ واقعہ کی اطلاع ملنے پر پولیس اور ضلع انتظامیہ کے اعلیٰ افسران موقع پر پہنچ گئے ہیں۔

میڈیا ذرائع سے موصول ہو رہی خبروں کے مطابق یہ حادثہ گوالیر ضلع کے مہاراج باڑا علاقے میں اس وقت ہوا جب کرین کی مدد سے تاریخی پوسٹ آفس بلڈنگ پر ترنگا جھنڈا لگایا جا رہا تھا۔ اس دوران کرین کی ہائیڈرولک مشین کا پلیٹ فارم تقریباً 60 فیٹ کی اونچائی پر تھا۔ اچانک یہ پلیٹ فارم ٹوٹ گیا اور میونسپل کارپوریشن اہلکار نیچے گر گئے۔ ایسے میں 3 ملازمین کی جائے وقوع پر ہی موت ہو گئی۔