بائڈن کی جیت امید، سچائی اور ایمانداری کی جیت ہے، وہ عوام کے اعتماد پر کھرے اتریں گے: امریکی نائب صدرکملا ہیرس

کملا ہیرس نے اپنی والدہ کو یاد کرتے ہوئے ان کی جدو جہد اور امریکہ پر ان کے یقین کو یاد کیا، اس موقع پر انہوں نے انہوں نے ایشیا کے لوگوں کی اور خواتین کے حقوق کی بھی بات کی۔

واشنگٹن: امریکہ میں باہر سے آنے والے خاندان سے تعلق رکھنے والی، پہلی سیاہ فام اور پہلی خاتون نائب صدر کملا ہیرس کا اس وقت خوشی کا ٹھکانہ نہیں تھا جب وہ جیتنے کے بعد پہلی مرتبہ منتخب صدر کے ہمراہ خطاب کرنے آئیں۔ اپنے خطاب میں انہوں نے کہا کہ ان کی جیت نوجوان خواتین کے لئے امید ہے، کہ وہ ملک کی نائب صدر بن سکتی ہیں۔کملا نے کہا کہ وہ اس عہدے کو حاصل کرنے والی پہلی خاتون ضرور ہیں لیکن آخری نہیں۔

انہوں نے کہا کہ امریکی عوام نے جس تاریخی اعتماد کا اظہار جو بائڈن کے طور پر کیا ہے ان کا وہ اعتماد امید، سچائی، ایمانداری اور شائستگی پر ہے۔ انہوں نے امریکہ کے نو منتخب صدر جو بائڈن کی تعریف کرتے ہوئے کہا کہ وہ بہت بڑے دل والے ہیں۔ کملا نے کہا کہ ان کے بڑے دل کا اندازہ اس بات سے ہو جاتا ہے کہ انہوں نے ایک خاتون کو اور وہ بھی سیاہ فام کو اپنا نائب صدر مقرر کیا۔

کملا ہیرس نے اپنی والدہ کو یاد کرتے ہوئے ان کی جدو جہد اور امریکہ پر ان کے یقین کو یاد کیا۔ انہوں نے ایشیا کے لوگوں کی اور خواتین کے حقوق کی بات کی۔ اس موقع پر انہوں نے یقین دلایا کہ وہ صدر کی اسی طرح وفادار رہیں گی جیسے صدر براک اوبامہ کے وہ خود رہے۔ انہوں نے کہا کہ راستہ مشکل ہے لیکن وہ عوام کے اعتماد پر کھرے اتریں گے۔ کملا نے کہا کہ امریکی عوام کو درپیش مسائل کو جو بائڈن حل کریں گے اور امریکہ کا پرچم پوری دنیا میں لہرائیں گے۔

کملا ہیرس نے پارٹی ورکرز اور رضاکاروں کا شکریہ ادا کرتے ہوئے کہا کہ انہوں نے بڑی لمبی لڑائی لڑی ہے اور یہ لڑائی انہوں نے پوری شائستگی کے ساتھ لڑی ہے۔ انہوں نے کہا کہ چار سال تک لوگوں نے بہت دکھ اور غم برداشت کئے ہیں اور سماجی انصاف کے لئے پرچم لے کر کھڑے رہے ہیں۔ پورے خطاب میں کملا کی خوشی چھپائے نہیں چھپ رہی تھی کیونکہ یہ ان کے لئے ایک بڑا دن ہے۔