ظہیرآباد میں ایک ہی خاندان کے 19افراد کرونا سے متاثر

ظہیرآباد:13/جون۔ تلنگانہ کے ظہیر آباد ٹاؤن میں ایک ہی خاندان کے 19افراد کورونا وائرس سے متاثر پائے جانے کے بعد سنسنی پھیل گئی۔ظہیرآباد سے تعلق رکھنے والی 55سالہ ضعیف خاتون کی  اس ماہ کی 9تاریخ کو حیدرآباد کے پرائیویٹ ہاسپٹل  میں علاج کے دوران موت ہوگئی۔اسی شب ظہیرآباد میں اس خاتون کی تدفین عمل میں لائی گئی۔

اس ضعیف خاتون کی موت کے ایک دن بعد پتہ چلا کہ متوفی خاتون  کورونا سے متاثر تھی رپورٹ کی بنیاد پر ضلع انتظامیہ نے اس خاتون کے قریبی رشتہ داروں میں 25افراد کے نمونے حاصل کرتے ہوئے ان کو جانچ کے لئے بھیجا گیا جس میں سے 19افراد کورونا سے مثبت پائے گئے۔ان میں چھوٹے بچے،خواتین اور مرد حضرات بھی شامل ہیں۔جو افراد مثبت پائے گئے ان کو سنگاریڈی ضلع اسپتال منتقل کیاگیا۔

عہدیداروں نے نشاندہی کی کہ اس ضعیف خاتون کی تدفین میں تقریبا40افراد نے شرکت کی تھی جن کی نشاندہی کے لئے محکمہ صحت کی جانب سے اقدامات کئے جارہے ہیں۔عہدیداروں نے کوویڈ19سے مثبت پائے جانے والے افراد کے علاقہ کو ریڈزون بنادیاہے۔