ماب لنچنگ کو ختم کیاجانا چاہئے، نفرت پھیلانے والوں کو سخت سزا دینے کی ضرورت: مہاراشٹر جماعت اسلامی

ممبئی: 21/اپریل (پریس ریلیز) میڈیا سکریٹری جماعت اسلامی مہاراشٹرا کی پریس ریلیز کے مطابق مہاراشٹرا کے ضلع پالگھر میں دو سادھوئوں سمیت تین افراد کی ماب لینچنگ کے بعد فرقہ وارانہ کشیدگی انتہائی قابل مذمت ہے۔ ہم حکومت کے ان فوری اقدامات کا خیرمقدم کرتے ہیں جس کے تحت دو پولیس افسران کو معطل کردیا گیاہے۔

جماعت اسلامی ہند مہاراشٹر کے امیر حلقہ رضوان الرحمن خان نے کہا ، ہم اس معاملے میں 100 سے زائد افراد کی گرفتاری کے پولیس کے اقدام کی بھی تعریف کرتے ہیں۔

مسٹر خان نے کہا ، یہ ایک افسوس ناک واقعہ تھا۔ انہوں نے مزید کہا کہ مرکز میں بی جے پی کی زیرقیادت این ڈی اے حکومت آنے کے بعد ہندوستان میں ’’ماب لینچنگ‘‘ میں اضافہ ہوا ہے۔ مہاراشٹر ایک مختلف ثقافت والی ریاست ہے اور یہ اس نفرت انگیز ذہنیت سے کم سے کم متاثر ہوا تھا۔
میں ریاست میں مہا وکاس اگھاڑی حکومت سے درخواست کرتا ہوں کہ ان نفرت پھیلانے والوں  کا سراغ لگائیں چاہے وہ معاشرے میں ہوں یا میڈیا میں یا سوشل میڈیا پر ، انہیں سزا دیں تاکہ نفرت پھیلانے اور قانون کو ہاتھ میں لینے والی نفسیات کاخاتمہ ہو ۔