بیدر: بورڈ آف اسلامک ایجوکیشن کرناٹکا کا جلسۂ تقسیمِ اسنادات و انعامات
بیدر: 31/جولائی (اے این این) بورڈ آف اسلامک ایجوکیشن کرناٹکا کی چلائی جارہی 15روزہ ریاستی مہم آوٴ تعلیمِ اسلامی حاصل کریں موضوع پر ایک جلسہ شہر بیدر کے ممتاز فنکشن ہال میں منعقد ہوا، جسکی صدارت محمد عارف الدین معاون امیر مقامی جماعت اسلامی ہند شہر بیدر نے کی۔
بورڈ آف اسلامک ایجوکیشن کے تحت چلائی جانے والی 15روزہ مہم کا تعارف پیش کیا گیا۔ مذکورہ بالا اجلاس کے ذریعے بورڈ آف اسلامک ایجوکیشن کے تحت چلائے جانے والے مختلف کورسز میں نمایاں کامیابی درج کرنے والے طلبہ و طالبات میں تقسیم اسنادات و انعامات کی تقسیم بھی عمل میں آئی۔
اس موقع پر محمد نظام الدین ممبر اسٹیٹ اڈوائزری کونسل آئیٹا کرناٹک نے افتتاحی کلمات میں بورڈ آف اسلامک ایجوکیشن کے قیام کے اغراض ومقاصد اور اسکے ذریعہ انجام دی جانے والی سرگرمیوں پر روشنی ڈالی اور اس کے مختلف کورسز کی تفصیلات پیش کی۔
اس جلسہ میں محمد آصف الدین رکن عاملہ بورڈ آف اسلامک ایجوکیشن کرناٹک و رکن شوریٰ جماعت اسلامی حلقہ کرناٹک نے مہم کے مرکزی موضوع "آؤ تعلیم اسلامی حاصل کریں” پر کلیدی خطاب میں بورڈ کے ذریعے انجام دیئے جانے والے مختلف سرگرمیوں کو معاشرے کی اشد ضرورت قرار دیا اور وقت و حالات کے پیش نظر مختلف واقعات کے حوالوں سے بورڈ آف اسلامک ایجوکیشن کی اہمیت و ضرورت پر تفصیلی اظہارِ خیال کیا۔
اس موقع پر بورڈ کے مختلف کورسیز میں نمایاں کامیابی درج کرنے والے طلبہ و طالبات میں اسنادات و انعامات کی تقسیم عمل میں آئی، جس کی کاروائی محمد مکرم آرگنائزر بورڈ آف اسلامک ایجوکیشن بیدر نے چلائی۔ محمد عارف الدین ضلعی صدر آئیٹا بیدر و معاون امیر مقامی جماعت اسلامی ہند شہر بیدر نے اختتامی کلمات پیش کیے۔ جلسہ کی کاروائی محمد عبداللہ مدثر آزاد ضلعی سیکریٹری آئیٹا ضلع بیدر نے بحسن و خوبی انجام دی۔
اجلاس کا آغاز محمد معظم رکن جماعت اسلامی ہند شہر بیدر کے درس قرآن سے ہوا۔ ناظم اجلاس عبداللہ مدثر نے تمام ذمہ داران و شرکاء کا استقبال کیا۔ اس موقع پر محمد خورشید احمد صدر آئیٹا بیدر یونٹ، محمد مکرم آرگنائزر بورڈ آف اسلامک ایجوکیشن بیدر، محمد طحہ کلیم اللہ سیکریٹری جماعت اسلامی ہند، شہر بیدر اور دیگر ذمہ داران شہ نشین پر موجود تھے۔ جلسہ کا اختتام محمد خورشید احمد صدر آئیٹا بیدر یونٹ کے تشکری کلمات و دعا پر ہوا۔ تمام شرکاء کے لیے ظہرانہ کا اہتمام کیا گیا تھا۔