آئیٹا،لیڈیز ونگ بیدر کی جانب سے شہرکی معززخواتین کیلئے تہنیتی تقریب

بیدر: 31مارچ (اے این ایس)آل انڈیا آئیڈیل ٹیچرس اسوسی ایشن آف انڈیا, شاخ بیدر (لیڈیز ونگ) کی جانب سے تعلیمی میدان میں نمایاں خدمات انجام دینے والی شہرکی معززخواتین کی خدمات کا اعتراف کرتے ہوئے تہنیت پیش کی گئی۔

تفصیلات کے مطابق شہر کے مولانا سید ابوالاعلی مودودی ہال نورخان تعلیم بیدر میں منعقد اس تقریب میں محترمہ اقبال النساء موٴظف صدر معلمہ، ڈاکٹر فردوس جہاں پرنسیپل منجیراکالج بیدر، ڈاکٹر سرورعرفانہ سی آر پی بھالکی کو تہنیت پیش کی گئی۔

اس موقع پر خطاب کرتے ہوئے کنوینرلیڈیز ونگ محترمہ بلقیس فاطمہ نےکہا کہ میعاری تعلیم پر خصوصی توجہ دینے کی ضرورت ہے۔ اس کے لئے بالخصوص اساتذہ ہی کو نمایاں کردار ادا کرنا ہوگا۔ عصری تعلیم کے ساتھ اخلاقی تعلیم کو بھی نئی نسل میں پروان چڑھانے کی طرف اشارہ کرتے ہوئے کہا کہ تعلیم کے ساتھ تربیت دینابھی اساتذہ کی اہم ذمہ داریوں میں شامل ہے۔ انہوں نے اس موقع پر معاشرے اور اردو اسکولوں کی زبوں حالی کا بھی تذکرہ کیااورکہا کہ اس میں سدھار کی پہل کرنے کی طرف توجہ دیں۔

جن خواتین کو تہنیت سے نوازا گیا انہوں نے اس موقع پر اظہار خیال کرتے ہوئے اپنے میدان میں آنے والے مختلف چیلنجز کا تذکرہ کیا اور اپنے پیشے میں انجام دیئے گئے تجربات کو تمام شرکاء کے سامنے رکھا۔ تینوں خواتین نے پیشہ ورانہ میدان میں پیش آنے والے مختلف مسائل کو سنجیدگی سے لیتے ہوئےان کے حل کے لئے منظم منصوبہ بندی اور مسلسل جدوجہد اور محنت کو جاری رکھنے کا سبب بتایا۔

پروگرام کا آغاز محترمہ نسرین فاطمہ ممبر آئیٹاکےقراٴت کلام پاک سے ہوا۔محترمہ وسیعہ شاہین نے نعت شریف کا نذرانہ پیش کیا۔ جب کہ محترمہ منہاج بیگم صاحبہ بی آرپی نے مہمانان کا استقبال کیا۔ محترمہ شاہین فاطمہ سکریڑی ونگ نےنظامت کے فرائض انجام دیے۔ جبکہ اس موقع پربہن صفورہ صدرجی آئی او بیدر یونٹ اور لیڈیز ونگ ممبران کی کثیرتعداد موجود تھی۔